قررت ابقى مسلمة

بداية احب اشكر ربنا على اعظم نعمة انعم بيها عليا وهى : نعمة الاسلام..


اللهم لك الحمد انك خلقتنى مسلمة لك وجعلت ابى وامى مسلمين لك ومن ذريتى  اناسا مسلمين باذن الله


قررت ابقى مسلمة على فكرة انهاردة :-).. وبكرة... وكل يوم ان شاء الله..


محدش يستغرب من كلامى..اللى شوفته امبارح اثبتلى فعلا انى لازم اجدد نيتى كل يوم حتى ف نيتى انى اكون مسلمة :)...


امبارح قابلت بنتين مش اعرفهم على بوابة الكلية وطلبوا يروحوا مكان يصوروا فيه ورق وبعد كدة شئون الطلبة. ف روحت معاهم وف الطريق عرفت انهم مش سنة اولى بس واحدة منهم  عندها اختها عايزة تعمل دراسات عليا ف الكلية عندنا..

البنت الاولى اسمها : شرقية والتانية اسمها سيلينا ... سألتهم عن البلد اللى جايين منها لما لاحظت ان طريقة كلامهم مش مصرى ف عرفت من شرقية انها من اليمن وعرفت ان سيلينا من فرنسا..

وكأن مثلا حد ضربنى او شئ قرصنى عليت صوتى لما سمعت فرنسا : فرنسا!!!!

استغرب من الجنسية خصوصا لما شوفت سيلينا لابسة حجاب بمعنى كلمة حجاب وعباية وفرحت اوووى ان لسة فيه حد متمسك بديننا الحمد لله برا وسالتها لو هيا مولودة مسلمة ولا لاء..وعرفت من شرقية انها اعلنت اسلامها من اربع سنين :)..

بجددددددددد البنت ديه بالرغم من انى اتكلمت معاها نص ساعة مثلا بس ربنا يكرمها على اللى حكيتهولى :):):)

عينى دمعت وخدتها ف حضنى ودعيتلها ان ربنا يثبتها يارب وعرفت منها قصة حياتها :)..

من اربع سنين كانت ف المدرسة وكانت من وهيا صغيرة بتسأل اسئلة كتيير عن ربنا وعن دينها وكان دايما زى ماهيا قالت بتدور على الحق .. لحد ماجه يوم طلبوا منها بحث ف المدرسة ف عملت البحث عن الدين الاسلامى وزى ماقالت حرفيا : عرفت الحق وقررت اعلن اسلامى ..

لكن ليس كل ما يتمناه المرء يدركه..

فى الاول والدتها وافقت على اعلان اسلامها  بس عملت مشاكل معاها وحرب لما قررت سيلينا انها تتحجب .. الحجاب الصح..

من الهدوم القصيرة للهدوم الطويلة
من الشعر الطويل للحجاب اللى بيغطيه
من العادات الغربية والحرية المفرطة للحرية اللى بيكفلها ديننا

مقالتش انا لسة صغيرة.. مقالتش انا شكلى حلو وحرام انى مش اعيش سنى.. مقالتش انا ليه معنديش بوى فريند وعاشت حياتها زى العادى ف بلادها.. 
كل ده عشان الحق :).. كل ده عشان اقتناعها انها على حق:)..كل ده عشان عرفت طريق ربنا وحبته..كل ده والحرب اللى خاضتها مع اهلها عشان خاطر اعتناقها عن اقتناع...

عاشت حياة صعبة والحجاب فى فرنسا شئ مش متعارف عليه .. 
دين جديد..لغة هيا متعرفهاش.. متعرفش ناس مسلمة !!!

كل ده وعمرها اقل من 20 سنة !!

بس قررت انها تستمر برده مع ان التحديات كانت قوية ربنا اعانها.. سابت كلية الب.. ودخلت جامعة حلب عشان  تدرس الشريعة واللغة العربية الفصحى .. وحكتلى عن احساسها وهيا بتصلى وبتقرأ القران اول مرة بالعربى... 

واحساسها وهيا حاضنة القران وبتبكى على كل يوم معرفتش فيه تقراه او تعرفه.. تبكى على كل ذنب عملته وعلى الحياة اللى عاشتها قبل ما تسلم..تبكى على وحدتها فى بلدها بس حاسة ب غربة بين اهلها اللى عايشة معاهم حياة صعبة بسبب اعتناقها الاسلام وهما مش مسلمين.. وضد اللى هيا عملته خصوصا بعد ما اتحجبت وبقى شكلها غريب بالنسبة ليهم..

راحت اليمن.. بلد غريب عنها..ناس غريبة..عادات تانية..لغة لسة بتتعلمها.. دنيا تانية دخلتها :)..

اتعرفت على شرقية : بنت يمنية وعاشت معاها وبدأت تكون صداقات عربية وتعرف ناس يعرفوها على الاسلام..

نزلت مصر مع شرقية عشان تشوف رمضان فى مصر وتشوف المكان اللى الرسول صلى الله عليه وسلم  قال عليه ادخلوه امنين..حبت المساجد وحبت الناس هنا :).. وحضرت لمصطفى حسنى ومعز مسعود وقالتلى على احساسها بالراحة..

بس سالتنى عن سؤال خلانى اقعد افكر هوا احنا ليه كدة..
لما شافت بنت لابسة الطرحة سبانش قالتلى هما لية الحجاب عندكم مختلف عن الحجاب اللى قريت عنه !!! وعرفت منها ان الاسبانش ده شئ متعارف عليه بس مش حجاب..طريقة او ستايل عادى للشعر للناس اللى مش محجبين وبيلبسوا عادى ف استغربت هيا اوى لما قولتلها ان ده حجاب!!!

فكرت مع نفسى شوية وسألت نفسى اسئلة كتير :)..

وليضربن بخمورهن على جيبوهن بقت ايه دلوقتى !!

بقت من لبس امهات المؤمنين -لايصف ولا يشف- الى كارينا والطرحة القصيرة اللى يدوب بتغطى الرقبة الى الاسبانش
من زمان لما الناس كانت بتركب وتسافر من مكان لمكان عشان تتأكد من صحة حديث وكل واحد فينا دلوقتى بقى يعمل دين ليه ويحلل ويحرم على مزاجه!!!ومش متأكد من المعلومة اللى بيقولها 

من زمان لما الناس كانت بتسال على بعض وتود بعض كانهم عايشين فى شقة واحدة الى منظر عربية الاسعاف اللى شوفتها شايلة جثة اب مات ف شقته ومحدش سأل عليه حتى من ولاده اللى كل واحد اتجوز ورماه لوحده لحد ما مات فى مكانه وقعد اسبوع لحد ما الناس عرفت ان فيه ميت ف الشقة!! 

انا لا داعية ولا بقول انى ملاك !!! انا بحكى موقف شوفته وعاصرته وبقول عليه وربنا اللى اعلم بالنية..

قررت والله يعلم مافى قلبى انى هكون مسلمة من النهاردة..ومسلمة جامدة جدا..فيه غيرى سافر بلاد عشان يعرف الحق وانا ربنا انعم عليا انى اتولدت مسلمة.. من ابوين مسلمين,, فى بلد تعتبر مسلمة.. 

وهموت مسلمة.. بس مسلمة..جامدة جدا :)..

ان شاء الله..

اللهم لا توفنى الا وانا مسلمة ومن ذريتى جيل مسلم ياارحم الراحمين.. 

وربنا يثبتك يا سيلينا :)..

امين..

by Hala Elwazery